يوميات حامل مخروشه أوي 

العنوان على وزن مسلسل يوميات زوجه مخروشه أوي ?

طبعاً للأبد نوره مخروشه مع البيت و الأطفال ، هالمره مع معجزه صغيره داخل بطنها يارب يتممه على خير 

بطبيعة الوحده اذا حملت تصير دراما حبتين ، حساسه و تنظر للأمور بأكبر من حجمها ، اكثر شي يريحها انها تفضفض ،، حبيت يكون هالبوست مساحه لي ، و يكون مرجع لتجاربي إذا حبت أي حامل تستفيد منه ?

طبعاً هذا ثالث حمل لي ، و يمكن اول حمل احمله و انا ناضجه اكثر و واعيه اكثر ،، قبل كنت صغيره كثير بعمر ١٩ و ٢١ 

و الحلو انه هذا اول حمل اكون منتظرته و متشوقه له و لكل مرحله فيه ، و أمومتي طلعت اكثر ،، عندي امل انه هذا الحمل بكون متفائله فيه اكثر و بحاول استمتع بكل لحظه فيه ، يارب أقدر ☹️

 

صورة ذات صلة

الشهر الأول / 

كنت احس اني مو طبيعيه ، من اول يوم ،، مشاعري متضاربه و بس افكر ، شهيتي مفتوحه للأكل و الوجبه اكلها دبل و قولوني علطول متهيج سواء اكلت شي او مااكلت شي يحسسه 

تجيني دوخه بسرعه و علطول ضغطي نازل ، كنت احس أنه فيه شي لكن قاعده اتجاهل الوضع 

حللت بالبيت ، طلعت النتيجه سلبيه قلت مشاكل قولون بس خلني اشرب اعشابي و علاجاتي و احرص على اكلي اكثر 

مر اسبوعين ، العاده تأخرت ، هنا حللت بالبيت و طلعت ايجابيه ?

المشاعر اللي جتني مثل اي خبر حمل يجيني من قبل ، فرحه يكسرها خوف من المستقبل ، من صعوبات الحمل و من صعوبات الولاده و التربيه و غيرها ، الحين المسؤوليه بتزيد و التعب بيزيد ، لكن سبحان الله مانقدر ألا أننا نحبهم ، زينة الحياة الدنيا ماشاء الله تبارك الله ?

مااستعجلت عالمستشفى ، اتخذت نمط غذائي جديد مناسب للحامل ، الكثير من البقول كمصادر للفوليك ، الكثير من الخضار ، اكون نباتيه تماماً ” هو النظام الأسلم للحمل ” 

و كنت مستمره على رياضة المقاومه ، حاولت اكمل لكن صارت تجيني تقلصات و دوخه تخليني مااقدر اكمل ، فـ قررت اسمع لجسمي و استمر على اليوجا المناسبه للحمل 

 

 

 

الشهر الثاني /

بدا الوحام ??

طبعاً وحامي شرير جدا جدا ، جدا 

اصير هيكل عظمي لاأكل و اا شرب فقط مغذي و ادويه تخفف الوحام ، كان عندي امل هذا الحمل بما اني على النظام الصحي من وقت ، يمكن الوحام يخف او مايجيني مثل قبل ، لكن للأسف ماتغير ?

تجيني متلازمة القيئ المتواصل ،، ماأصحصح الا بعد ابرة الفولتارين حقت الغثيان ، بعدها ابدا اصحصح و اكل قد مااقدر ، اخزن لباقي الايام الجايه 

طبعاً بهالشهر صعب جدا اضبط اكلي ، هذا اذا اكلت ، لكني احاول قد مااقدر اكل لو لقمه من اي نوع من الفواكه و الخضار ، اشرب عصيرات فريش قد مااقدر 

اكل الاشياء المقرمشه مثل الخيار و الخس ، انعش نفسي ببطيخ او خوخه بارده 

فيه حركه ريحتني كثير و هو اني اقطع خوخ صغير ، و احطه بقوالب الايس كريم و اصب عليها ماء جوز هند و احطها بالفريزر ، ايس كريم سريع و منعععش ، لاحظت الاشياء البارده تريح بطني كثير 

نتيجة بحث الصور عن ‪healthy fruit ice cream‬‏

أتمنى بس هالشهر يعدي عشان ارجع للأكل و اقدر انتبه لصحتي و رياضتي 

شي مزعج اني احس وراي مسؤوليات و شغل و زوج و اطفال اشوفهم محتاجيني و انا مااقدر اسوي لهم شي غير اني انتافض عالسرير من التعب ☹️? 

فيه اشياء ساعدتني عالسيطره على الوحام شوي ( اضغطي عالصوره يوديك للمنتج )

Sea Band, رباط المعصم الضاغط أكيوبريشر، زوج واحد

هذه الاسواره اخذتها من اي هيرب ، مستوحاة من الطب الصيني اللي هو النغز بالابر ، لكنه ابسط ، فيه خزره تضغط على عصب معين يخفف لك الغثيان ، مكتوب انه يستخدم للمسافرين بالطياره و الوحام و اللي ياكلون ادويه تسبب غثيان 

ريحني كثير و خلاني اقدر اسيطر على الغثيان خصوصا اذا كنت طالعه برا ، يمكن خفف الغثيان بنسبه ٤٠٪‏ 

 

Three Lollies, قطرات بريجي بوب، بالفاكهة الحامضة، 21 قطعة
هذه الحلاوة هي اللي تخليني اقدر اقوم من النوم ، اول ماافتح عيني اكل منها و اذا طلعت بالسياره اكلها ،، فكرتها انها تشغلك عن التفكير بالغثيان ،، طعمها حلو جدا و مكوناتها طبيعيه ، بالبدايه كانت تساعدني كثير بعدين صارت ماتجيب نتيجه ، او يمكن طفشت من طعمها ?

كذلك احط بالفواحه روائح عطريه تخفف لي الشعور بالوحام ، الروائح الحمضيه مثل الليمون و البرتقال ، كذلك العشبيه مثل الصنوبر و اكليل الجبل تريح كثير خصوصا للغثيان 

 

 

 

 

الشهر الثالث /

هالشهر كان أصعب شهر بالنسبه لي ، طول الوحام الشديد معي و بديت أيأس و أطفش ، لين ماقررت التداوي بسورة البقره ? الحمدلله رجعت لي روحي و صرت أتقوى فيها ، كنت فقط محتاجه أمل و صبر ، و هالشي مايجي من غير ربي سبحانه الكريم ?

الغثيان و الترجيع يزيد و ينقص ، لكن موجود ، صراحه هذا اكثر حمل اتعب فيه من الوحام ، كنت اتعب بالحمل اللي فات لكن كان يمسك معي اسبوع او اسبوعين و يوقف خلاص و اكمل اعيش حياتي ، هذا الحمل كان شهرين متواصلات متوقفه عن ممارسة الحياة بشكل طبيعي و التفكير و الاكل بشكل طبيعي ، ياربي لك الحمد أن شاء الله كله بأجره

الحين رجعت أكتب و أنا بالأسبوع الاخير من الشهر الثالث ، و اخيرا بدا يخف ، و بديت ارجع أكل و أرجع للرياضه و نمطي الصحي السابق ” اشتقت لنفسي ?”

الحين صرت أحاول أدخل اكبر قدر من الفيتايمنات لجسمي ، خصوصا بعد ماقفدت الكثير خلال فترة الوحام و بديت احس بأعراض فقر الدم من ضعف اظافر و تساقط شعر و دوخه و غيره

العسل الأسود و الشمندر و الجرجيرو السبانخ و الرمان و الكينوا و الشوفان من الأشياء اللي احرص ادخلها بيومي

كل يوم اشرب سموثي ، اكل حصة من البقول ” فول حمص ، فاصوليا ” ، أكل خضار بجميع اشكالها المطبوخه و النيئه ، قاعده احاول اقلل زيوت و سكريات قدر الإمكان ” حتى الصحي منها ”

ضروري أكون صارمه بنظامي خلال الحمل ، لسلامة جسمي و سلامة جنيني ، نبي نحارب بهذه الحياة عشان مانخسر صحتنا و نمر بحمل مريح و ولاده سهله بإذن ربي

 

 

 

الشهر الرابع /

الحمدلله دخلت بشهور الحمل الجميله ، الحين نقدر نقول أننا نبي نستمتع بالحمل و نحس بكل الجمال اللي فيه ،، ههههه ان شاء الله مارح اطفشكم حلطمه هالشهرين خلصنا وحام الحمدلله و بدينا بأجمل شهرين

الحامل أجمل و احلى و أخف شهر بالنسبه لها هو الشهر الرابع و الخامس ،، مافيه مشاكل حمل من ثقل ووحام و حموضه و انزعاج بالنوم ، فقط كرشه صغيره ماتدرين تخفينها و لا تبينيها ?

سويت لي برنامج تغذوي مبسط حرصت يكون فيه اكثر كمية فيتامينات ، جهزت لي وجباتي و سناكاتي عشان ماأتكاسل آكل شي مفيد أو أضطر أني اروح للمضر الجاهز

نتيجة بحث الصور عن ‪prep meals‬‏

بعطيكم مثال للجدول اللي سويته ، من مبدأ أني أشارككم مو عشانه هو المثالي و الصح و اللي لازم كل الحوامل يسوونه ، بس أعطيكم إلهام للي ممكن تسوونه حسب احتياجكم و المقادير المتوفره عندكم و اللي تحبونه

أنا من قبل الحمل كانت سعراتي عاليه على قد احتياجي ، عشان كذا أفطر دفعتين و اتغدا دفعتين

الفطور /

عصير جزربورديج شوفان مع ملعقة عسل اسود ( مليان حديد )

فول + خبز شعير + بعض النواشف + شاي الحمل

الغداء /

رز اسمر + أي نوع ايدام مثل ايدام عدس او باميه أو خضار

سلطة كينوا

سناك /

جزر + خيار + نوع فاكهه + حمص

العشاء /

بطاطس مسلوق + حمص + أفوكادو

سموثي شمندر

هذا مثل وارد جدا يتغير بس حبيت اشارككم ياه

مثل ماتلاحظون الأكل كثير لكن سعراته قليله و مليان فيتامينات و ما فيه زيوت و سكريات و هذا المهم للحاملو الكميات حسب وزنك و حاجتك

الرياضه مههههمه جدا وقت الحمل ، بعكس الموروثات اللي سمعناها من الأولين ، الحامل ترتاح ، تنسدح ، ماتشتغل ، ماتتحرك كثير

الأصل هو العكس تماااااااامااااااا ?

اذا حملك سليم و مافيه مشاكل تسقيط او نزيف ، اشكري ربك و لا تقعدين ، تحرررركي قد ماتقدرين ، اعملي الرياضه المخصصه للحمل اللي تقوي لك الظهر ” العمود اللي بيشيل لك الجنين كل الأشهر القادمه بإذن الله ” و الأفخاذ و البطن ، كل عضله بالجسم تحتاجين تكون قويه عشان تشيل المعجزه الصغيره اللي بطنك و تكون عندك قاعده و عضلات قويه مستعده للولاده لأنها عمليه صعبه جدا تحتاجين تتقوين لها كل فترة الحمل ، بنات الرياضه شي مهم جدا خلال الحمل و من قبله عشان نقدر نمر بحمل جميل و مريح بإذن الله

Always important to have a pregnancy workout at your fingertips

و هذه تمارين جميله جدا لتقويه الحوض و الظهر خلال الحمل ، سويها شوي شوي و بين كل تمرين و تمرين اوقات راحه

شي ثاني قاعده احاول احرص عليه هو

شرب الماء

نخلي قارورة الماء علطول بيدنا و قدامنا ، بالصاله بالمطبخ بالمكتب كلما تذكرنا نشرب ماء و مايحتاج نذكر فوائده الكل صار حافظها ?
ممكن تكون سر صحه اي شيء بالجسم ، حتى لو ماتحبين الماء تقدرين تسوينه ماء ديتوكس او باختصار ، عودي نفسك ، مثل ماتعودتي على قل الماء تعودي على شربه

الشهر الخامس /

صورة ذات صلة

توني داخله الشهر الخامس و بدت الدوخه و الانزعاج وقت النوم و من الجلسه الطويله من الحين ، كل حمل يختلف عن الحمل الاخر مستحيل يصير حملتين نفس الظروف ، حملي السابق كان الثقل هذا يجيني بالسادس

طبعا الدوخه من الوقفه الطويله غالبا ، بعض الحوامل تجيهم بعض الحوامل لا ، ممكن يكون سببها نزول الضغط ( بطبيعة الحامل دايم ضغطها يكون نازل ) او نزول سكر

اذا جتك هذه الدوخه علطول ارتاحي و انسدحي و مدي رجولك و اشربي ماء ، دقايق و تروح باذن الله

احس معدتي صايره حساسه من اشياء غريبه مثل الحليب و القهوه تتعب قولوني ،، قاعده اشارككم هالتفاصيل عشان ابين لكم انه طبيعي الحامل تحس باختلاف او شي غريب فيها ، تغيرات فيزيائيه و كيميائيه و هرمونيه قاعده تمرين فيها طبيعي تحسين باعراض غريبه مثل كذا

الاعراض اللي مانتجاهلها شوفوها هنا من موقع بيبي ينتر ارابيا هو مرجعي الجميل لكل مراحل الحمل

الحين يبدا شغب الجنين شوي و ترفيساته اللطيفه بسم الله ماشاء الله ? يبدا التواصل يكون حقيقي بينك و بين الروح اللي داخلك

نحتاج نكثر مصادر البروتين و الحديد و النحاس و الزنك ، عشان الدم اللي بيصير يروح للجنين بشكل اكبر من قبل الحين

جنينك كل يوم بيكبر و يخلق فيه شي جديد سبحان ربي ، عشان كذا مانقصر فيه من ناحية الفيتامينات و الاكل ، ابدا لا تفكرين بوزنك بالحمل و تجوعين نفسك مو وقته الحين بعد الحمل كل شي بيتعدل ، فكري بدمك بس و جودة اكلك

المكملات اللي كل يوم أنسأل عنها ، اممم لحد الأن مااخذت شي و لا جربته عشان كذا مااقدر افتي بهالشي الحين

قاعده احاول اكثر مصادر فيتامينات طبيعيه من الاكل قد مااقدر ، و مؤمنه جدا أنه ربي خلق الكمال بالغذاء اللي خلقه للبشر بدون الحاجه للمكملات ، هذا رأيي الشخصي اللي احب انا امشي عليه أما اذا بنصح ، بقول استشيري طبيبتك بعد التحليل و الفحص هي اللي بتعرف اذا بتحتاتجين او لا

الشي اللي ضروري نحرص عليه بالحمل هو 

صورة ذات صلة

دللللللللعي نفسسسسك ، أنتي تستحقين الراحه و النقاهه لا تبخلين على نفسك بجلسة بديكير و لا تجديد ستايل بالصالون و لا مجموعة جسم عطريه جديده مع بجامه كيوت و لا بانيو ساخن مع املاح عطريه ( جدا ممتازه للحمل لكن لا تقعدين اكثر من ٢٠ دقيقه بالبانيو )

طلعه مع الناس اللي تحبينهم ، كوب قهوه عالبحر ، كوب شاي اعشاب مع كتاب ، اي نوع من انواع الرفاهيه سويه لنفسك لا تتعذرين بالزوج و الاطفال انتي تقدرين و تستحقين هذا

لأنك أنسانه عظيمه و شايله معجزه ببطنك و بتسوين اقوى مهمه بهذه البشريه و هي الأمومه ، لا بتخلين على نفسك بمكافآه صغيره بأي شكل تحبينه و تقدرين عليه

الحامل نفسيتها تتقلب كثير و تصير حساسه زياده و عرضة للإكتئاب ، لا تنتظرين الإكتئاب يجيك من الهم و التفكير اهربي منه و دلعي نفسك ، وصية هذا الشهر : دللي نفسك ?

خصوصا انك بعد الحمل مافيه مجال تهربين لنفسك بيكون فيه طفل و سهر و ترضيع و اهتمام ، شوفي ذاتك الحين بعدين مافيه وقت

 

 

الشهر السادس /

الحمل, أمي, الإنجليزيةPNG صورة

و بدينا مرحلة الحموضه الزايده و ضيق التنفس ، الصغير النقطه بدا يكبر شوي و يضغط على الأعضاء اللي فوق 😁

الحموضه طبيعيه جدا بالحمل و مالها علاج جذري تماما لكن لها بعض الحلول اللي تخففه

تجي الحموضه بسبب هرمونات الحمل و ضغط الجنين على المعده

الحل هو : ماتاكلين كميه كبيره دفعه وحده ، صرت اخلي وجباتي على دفعتين حتى لو ماشبعت تماماً ، آكل صحن الحين و بعد ٢٠ دقيقه اكل صحن ثاني ، فطوري مثلا أول شي ابدا بسموثي بس و بعد ربع ساعه اكل وجبه الفطور ، و هكذا

العشاء اكثر شي اهتمي فيه انه يكون خفيف و مافيه اكلات تهيج الحموضه مثل البهارات و اللحوم و الحليب

الخيار و اللوز او حليب اللوز و منقوع اللبان و خل التفاح المخفف من اجمل مهدئات الحموضه اللي جربتها

صرت كل يوم قبل النوم اشرب حليب لوز يساعدني انام بدون ازعاج الحموضه

و الماء اللي جنب سريري ناقعه فيه لبان عشان اذا قومتني الحموضه من النوم اشرب منه علطول ( أكثر شي تتهيج وقت النوم )

الحين حركة الجنين صارت اوضح و أنشط ، اتوقع الشهر السادس و السابع تكون حركته نشيطه و يكون مرتاح بهالشكل لكن بعدين بيكبر و يضيق الرحم عليه و تصير الحركه اثقل

الحين الحاجه للأكل اكبد من قبل ، ضروري نرفع سعراتنا من ٢٠٠ لـ ٤٠٠ سعره ، و نكثر مصادر فيتامينات لأن الجنين كبر و صار يحتاج مغذيات اكثر

يعني الكثر من الخضار و الفواكه و الحبوب الكامله و البقول

أحب أخلي سناكاتي الصحيه جاهزه عندي علطول بحيث اذا صار و قت القهوه “شعير طبعا” أكل معاه حلا #يغذي-ما-يأذي ،، مثل كرات الطاقه البروتينيه و الواح الطاقه ، أو الجرانولا بار ، اذا ماسويتها من قبل اسهل حل ” تمر مع طحينه سمسم و عسل اسود ” مصدر بوتاسيوم و كالسيوم و مغنيسيوم و حديد و الكثير من الفيتامينات

صديقتي الصدوقه خلال الحمل هي زبدة الشيا ( أضغطوا عالصوره يوديكم لرابطها كود الخصم ٢٠٪ : NON  )

أحسن زبدة شيا جربتها للآن و خلصتها و بطلب ثانيه و ثالثه و رابعه بستمر عليها لبعد الحمل عشان التخلص من التشققات اللي بدت تطل شوي

شوفوا موضوعي حق العنايه بالبشره و التخلص من التشققات

نتيجة بحث الصور عن ‪pregnancy relax‬‏

النفسيه ؟

ماأدري اذا كنت حساسه زياده عن اللزوم أو عصبيه زياده عن اللزوم ، لكن يبين بعد الحمل بقول اوو شقد كنت حساسه و نفسيه 😅😅

قاعده احاول قد ماأقدر ابعد عن أي شي يوترني علطول اكنسله ، ناس مقابلهم يجيب لي توتر و ازعاج تركت جليتهم ” عالاقل خلال الحمل عشان اعرف اني مارح اسيطر على مشاعري كويس ” أماكن مزعجه و تجيب لي التوتر ماصرت اروح لها ” بناتي لين اليوم يبون يروحون تشاكي تشيز و انا ارفض 😄💔”

أول ماأحس نفست علطول ادخل غرفتي و اشغل شموعي و احط من العطور و الروايح اللي احبها و أحاول اخذ شهيييييق ، أخذ شاور دافي أعبي البانيو و احط املاحي ، ألبس البجامه اللي احبها و اقعد أقرا كتاب

أسوي شاي شمر ” كويس للحمل ” أو شاي ورق التوت و اقعد تحت ضوء الأبجوره

هذه الأشياء اللي ألملم فيها نفسيتي و أنا بالبيت ، إذا قدرت اطلع طلعت مشيت شوي أو طلبت عصير جزر و اقعد ادور بالمجمع ” أدور ، أمشي ، أتحرك ” المشي افضل من الجلسه

و لاتقولين مافيه احد يدلعني ، الظروف الاطفال الزوج الوظيفه الناس ، هذه اعذار باليه ، هالشي يجي منك انتي اذا قررتي أنك بالمقدمه و انك تدللين نفسك محد بيقدر يمنعك ، و لاااا تنتظرين من احد يطالع لك و يدلعك هالسي منك و لك أنتي فقط

ضروري نهتم بنفسيتنا خلال الحمل أكثر من غيره ، نبي حمل مريح نفسيا و نبي نستمتع بكل مرحله فيه مانبي نخرب على أنفسنا ، اذا استسلمتي للنكد بتتنكدين كل حملك و تقولين : اف متى اخلص منه بس ، و اذا سيطت عليك هذه الافكار صدقيني بتطول الولاده و يتصعب عليك 😅

الرياضه

أخ من الرياضه و ماأدراك ما الرياضه ، لقوة الجسم ، سرعه استعادة الوزن بعد الحمل ، النفسيييييه العسل تفرغ كل سلبيتك

ارجع أأكد عليها ، أحنا نبي جسسسسسم قوووي بنات الحمل مايمشي بسهوله على جسم ضعيف و عضلات مهلكه ، الحمل مو شي سهل يمر عليك لازم تعدين له جسم قوي يشيله

بالشهر السادس و بعده ، او لما يبدا يثقل الجنين تصير أفضل رياضه بالنسبه لك هي السباحه ، او الرياضه تحت الماء ، جدددداً جميله

لأنك تحت الماء فـ الماء بيرفع لك وزن الجنين عن الأربطه و الحوض و بتصيرين تتحركين اسهل و تقدرين تمرنين عضلاتك اسهل

و ظهرك بيرتاح وقتها لأن الماء رافع لك وزن الجنين عنه

إذا حولك نادي فيه مسبح لاااا تترددين انك تسجلين فيه صدقيني مااارح تندمين 👍

اليوجا كذلك جدا ممتازه ابحثس عنها عن تقنيات التنفس بيوتيوب ، تساعد انه عضلاتك تكون مرنه و اكثر و الحوض يتوسع اكثر استعداداً للولاده و الاكسجين يدخل جسمك اكثر

مع الرياضه حملك بيصير اسهل ، أخف ، نفسيتك افضل ، حتى ولادتك بتكون اسهل و اقصر بإذن الله

 

 

الشهر السابع /

صورة ذات صلة

عنوان هذا الشهر : حموضه + حمام ” تكرمون” 😅

هذه اكثر المشاكل البارزه خلال هذا الشهر، و تطرقت لبعض حلول الحموضه بالشهر اللي فات ، بس يمكن مفعولها يكون اقل هذا الشهر و الشهر اللي فات

هالتعب هذا للي بيخلينا نحب أبناءنا أكثر صح ؟ 🙃

الحين يمكن يمكن تبدا تقلصات براكستون هيكتس او الطلوق الكذابه مثل مانقولها

ماتكون طلق طلق ، لكن شوية تقلصات اسفل البطن و الظهر ، الحين بيجي دور بخاخ المغنيسيوم ” الرابط بالصوره “

Life Flo Health, زيت المغنيسيوم الصافي، 8 أوقية (237 مل)

بيهدي الشد و الآلام ،، استشيري طبيبتك قبل ماتستخدمينه

كذلك املاح البانيو قاعده استخدم هذا النوع جميل جدا لتسكين الالام بشكل عام خصوصا الظهر تبدا الآربطه الحين ترتخي اكثر و تضعف فالعلاجات من هذا النوع تريح كثير

Petal Fresh, أملاح الحمام المعدنية، أوكالبتوس، 20 أوقية (567 جم) Pure

طبعاً رشحت هذه المنتجات لأني جربتها يمكن فيه احسن منها ماادري تقدرون تستخدمون اللي تحبون بس نفس الفكره

المفروض الحين اكثر تمارين التنفس + توسيع قاع الحوض + مشي

و بديت ببرنامج الثلث الاخير من الحمل

شاي الثلث الاخير من الحمل :

Earth Mama Angel Baby, الشاي العضوي لفترة الثلث الثالث من الحمل، خال من الكافيين، 16 كيس شاي، 1.3 أُونْصَة (37 جم)

و شاي ورق التوت

Yogi Tea, Woman's Raspberry Leaf, خال من الكافايين, 16 أكياس شاي, 1.02 أونصة(29 غ)

هالشواهي ممتازه لتسهيل الولاده و لحمل سليم بشكل عام ، انصح فيها جدا جميله

الحين النوم يصير صعب حبتين ، بين حركة الجنين و البحث عن الوضعيه المريحه لك و لكرشك 😅 أيضاً الحموضه اللي اذا عرفت انك بتنامين اشتبت 😷

فـ لا تضغطين على نفسك بالنوم نامي اي وقت تقدرين تنامين فيه عصر ظهر مغرب ، اصلا بعد الولاده نومك بيتلخبط بعد فـ لا تضغطين على نفسك بتوقيت النوم نامي متى ماقدرتي

الحين جاء دور البحث و القراءه اكثر بخصوص عملية الولاده و الاحتياطات اللي لازم نسويها قبل الولاده و خلالها

حضرت مؤخرا هذا الكلاس جدددا فادني و عطاني معلومات جديده علي مع اني سبق ولدت  ” بالانجليزي مافيه ترجمه للاسف و مالقيت محتوى عربي فيه نفس هالكم من المعلومات ، له اجزاء انصحكم تشوفونها كلها “

و هذه البنت حبيت كلامها كثير بخصوص كيف تسترخين وقت الولاده

عموما لكل اللي تخاف من الولاده ، إيش قاعده الخوف ؟ هو المجهول

خوفنا دايم مش من نفس العمليه ، الخوف يكمن بأننا ماندري ايش بيصير ، اذا عرفنا كل تفصيل بيصير خلال الولاده و كيف جسمك بيشتغل خلال الولاده وقتها بتتطمنين لأنك عارفه ايش بيصير

لاتوقفين عن القراءه و البحث عن الولاده كلما عرفتي اكثر كلما راح الخوف اكثر

خصوصا انه الخوف بيصعب الولاده علمياً ، المشغّل بعملية الطلق و الولاده كلها هرمونات ، فـ خوفك بيخلي الطلق يطول و اكثر ايلام و البيبي بصعوبه رح يطلع ، عشان كذا نبي نتدرب عالتنفس و الهدوء و نهيئ نفسنا لكل اللي بيصير بإيجابيه و راحه

هالشهر بنكون مشغولين بتجهيزات البيبي و النفاس

بسولف لكم عن تجهيزاتي بتدوينة ثانيه ان شاء الله

39 thoughts on “يوميات حامل مخروشه أوي 

  1. الله يقوم كل حامل بالسلامة و يرزقنا الذرية الصالحة المتعافية ..
    و يأجرنا على كل لحظة وحام 💔
    أستفدت من كل شيء كتبتيه الله يوفقك و يجزاك خير 💕

  2. جميل الله يكرمك و يبارك فيك و لك
    هل في كريمات معينة تنصحي بيها للبطن و الصدر و لعلامات التمدد

  3. الله يتمم لك وييسر لك كل عسير يارب ياكريم ..
    ألهمتيني جدا وان شاء الله حملي الجاي اهتم بغذائي كثييير ولا احتاج مكملات.. ولادتي السابقة كانت قيصرية ما جاني طلق وسمعت من ريم العنزي انه بسبب ارتفاع الكالسيوم، فقررت مااخذ مكمل الا اذا اثبتوا لي انه عندي نقص .. وان شاءالله مع النظام الصحي مااحتاج حتى للحديد.. تولدين بالسلامة يااارب ..

  4. عمره ماكان النظام الصحي خطر او يخوف لأي حاله ، بالعكس التأثير الايجابي بيكون ملحوظ بالنسبه لك باذن الله
    الحامل لها الأولويه بالاكل الصحي كيف تخاف منه بالعكس تماما
    ربي يسهل لك ياحلوه

  5. مدونة جميلة جدًا, ممتنة لحجم المعلومات المفيدة والتحفيز اللي اخذه من مدونتك وسنابك ()
    عندي سؤال !
    أنا ما اثق بالدكاترة تبع المستشفيات الخاصة والحكومية مأساة, لذلك حبيت أداوي نفسي بأكلي, لكن لسى ما ألتزمت بالنظام الصحي وأخاف أحمل وأنا على هالنظام.
    ما مدى تأثر حملي بالنظام الصحي المفاجىء ؟ يعني لو حملت وبدأت مباشرة بالنظام الصحي هل فيه تأثير سلبي ؟!!

  6. مدونة جميلة جدًا، اسلوب شيق ولطيف، خليتيني اصيح على آخر الجمل بشأن الأمومة في الشهر السادس، مؤثر جدًا.. قوية ماشاء الله عليك والله يزيدك قوة يارب ويسهل عليك، ويتمم حملك وحملي على خير يارب.

  7. التمارين من قبل الحمل و من اول يوم حمل ، شوفي بيوتيوب تمارين الربع الاول من الحمل سويها

  8. شكرا على الموضوع المفيد والممتع بس انا أول حمل لي متى أبدأ أسوي التمارين اللي تقوي الحوض وايش أنسب شي وشكرا والله يتمم لك على خير❤️

  9. بيتراكم من المكملات ممكن ، لكن من الغذاء الطبيعي كل فيتامين رح يروح لشغله ، و الجنين ياخذ كذلك عشان كذا مافيه مجال يتراكم شي

  10. بطبيعة الحامل تكون مناعتها ضعيفه ، المهم انها تبتعد عن الأشياء اللي تضعف المناعه مثل السكريات و الاغذيه الحمضيه مثل اللحوم و منتجات الالبان
    العسل و الحبه السوداء من اهم الاشياء اللي تقوي المناعه

  11. امين يارب ،، فعلا و انا كذلك احب اقرا يوميات الحوامل الاجانب و استمتع فيها ، فـ قلت افيد فيها غيري ، نشوف تجارب اكثر نستفيد اكثر

  12. الله يسهل لك ويكتب لك ساعة السلامة ?
    جميلة يوميات الحامل استمتع بقرائتها ومقارنتها مع يومياتي، وحمك شبيه جداً بوحمي معاناة طول اليوم، كان وحمي في أطفالي الثلاثة يستمر ٦ أشهر! تخيلي! محد يلومني اذا كرهت الحمل ?

  13. السلام عليكم!!عندي سؤال عن الأغذية الا لازم المرأة الحامل تاخدها عشان تقوي مناعتها! و شكرا

  14. عندي سؤال دايم يحيرني، الحامل ضروري انها تكثف من مصادر الكالسيوم والحديد الطبيعية زي السمسم والعسل الأسود والشمندر عادي ماراح يتراكم جوا الجسم زي لو ماكثرنا منها في الحالة الطبيعية بدون حمل؟

  15. ماشاءالله تبارك الله الله يبارك لك ويتمم لك على خير و انا ان شاءالله ناويه امشي على نفس نظامك بالموجود عندي ?? الله يسهل لنا اجمعين

  16. كنت اكلها مره بالاسبوع او الاسبوعين ، العصير الأخضر مفيد لكل شي ? الله يبارك فيك امين يارب

  17. اممم مافيها شي يخوف و لا عليها تحذيرات للحامل ، عادي بحطها مع وجباتي بين يوم و ثاني مو أني بحرص على اكلها كل يوم ، كل شي باعتدال

  18. الموضوع مو تفسير علمي او غيره ،، كل العلم يقول انه كل حمل بيختلف عن الثاني ، حملي الأول مثلا ” على اساس من اهمالي ، ماكليت المكملات ” و ضليت اعمل رياضه حتى بعد مادريت اني حامل ، كان حمل خفيف الحمدلله و اتحرك و اروح و اجي
    الحمل اللي بعده كنت مطيعة جدا للاطباء ، اي حبة مكمل و دواء اخذها و مرتاحه طول الوقت بدون حركه و مااتعب نفسي و اكل عن شخصين مثل مايقولون بغض النظر عن نوعية اكلي ? و كان حمل صعب جدا ثقل و كل شوي مشاكل و الولاده كانت كارثيه مو بس صعبه ?? الحمدلله على كل حال و هذا اللي خلاني التزم بالنظام الصحي خصوصا بحملي
    انا بطبيعة الحال وحامي سيئ جدا و هذا الشي الوحيد اللي قاعده اشكي منه ، يمكن عشاني هذا الحمل حاولت قد مااقدر اني مااخذ حبوب الوحام و ماأكثر من ابره الغثيان ،، فـ بين التعب علي اكثر ، لكن الحمدلله عندي امل كبير انه الأشهر الجايه تكون اخف و اسهل بإذن الله
    عموما انصحك بالرياضه اي نوع هي الداعم الرئيسي لصحة الحمل ??

  19. الله يعينك يارب ويتمم لك ع خير
    بس غريبه انه اشد من اول مع انك انسانه صحيه ولك سنه وعليها واكلك نظيف
    انا نفس الحاله ،، مشاكل حملي هذا اكثر من الاول مع انه قبل كنت اداوم وكنت اضطر اوقف واتحرك اغلب الاوقات والاكل خربوطي ،، هذا مع البطاله وقلة الجهد وتحولي للنباتيه من ٨ شهور واحيانا نباتيه صرفه “فيقن” الا التعب اكثر

    ياليت لو تعرفين تفسير علمي تخبرينا ،
    هل هذا معناته اننا صرنا نسمع لجسدنا بشكل اوضح ،، بحيث نحس بأي خلل ؟! ،، او هل هو النقيض تماما

  20. ماشالله الف مبروك الله يتمم لك على خير انا برضو حامل في بداية الرابع الله يطعمني ويطعمك الطفل السليم المتعافي البار❤️❤️❤️

  21. ماشاءالله تبارك الله ، الله يتمملك بخير و يعمِّر حياتك بالسعادة و السلامة و يرزقك شوفتهم عرسان وعرايس و عيالهم بصحة و عافية ، اللهم آمين ..

  22. الله يتمم على خير …
    هل ناويه تدخلين بذور الشيا في نظام اكلك خلال الحمل ؟
    انا حامل وودي اكلها بس متخوفه

  23. ألف مبروك، موضوع شيق ومفيد والله يتمم حملك على خير يارب، كم مرة كنتي تاكلين لحوم في الشهر؟ وهل العصير الاخضر مفيد للحامل ولا يضرها؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *