الديتوكس .. نظام تطهير الجسم من السموم

السلام عليكم و الرحمه

لي 4 ايام كنت مسويه ديتوكس الدكتوره فاديه الثبيتي و كنت ناويه اكتب تجربتي كامله عنه لكن كثرت الأسئله عليه بسنابي و حبيت اتكلم عنه كامل الحين

بشكل عام ، إيش هو الديتوكس

هو نظام غذائي معين نسويه لمدة معينه لتساعد جسمنا ينظف نفسه

بعض دكاتره رفضوه و قالو انه خرافه بحجة أنه الجسم طبيعيا ينظف نفسه عن طريق الكلى و الكبد و غيره و هالكلام 100٪ صحيح

 صحيح ربي خلق جسمنا ينظف نفسه طبيعيا

لكن

لكن

لكن

لو أحنا ناكل الأكل اللي خلقه ربي بشكل طبيعي ، و نتنفس الهوا الطبيعي ، و نحط على جلودنا منتجات طبيعيه ، ماكان احتجنا ديتوكس

لكن اكلنا فيه مصنعات خصوصا المعبات و الوجبات السريعه و المأكولات الجاهزه ، الصابون و الكريمات كلها صناعيه ، الهوا مليان مخلفات مصانع و ملوث

كل هذه التراكمات تسوي ضغط عالجسم تخليه يقول : أصفي إيش و لا إيش ؟! 😵 و منطقيا مافيه ضرر إذا ساعدنا جسمنا بأكل نظيف و طبيعي و صارم لمدة كم يوم عشان يرمم نفسه

خصوصا أنه مايخوف ولا هو صعب

عدة أيام ناكل فيها خضار و فواكه و بعض الحبوب و البذور فقط ، منطقي جداً 👍

إيش اعراض تراكم السموم اللي تخليك تحتاج تسوي ديتوكس ؟

  1. الصداع و الإرهاق المستمر
  2. المشاكل الجلديه من حبوب و بثور و حساسيات
  3. ثبات الوزن
  4. مشاكل الجهاز الهضمي من تلبكات و صعوبة هضم و امتصاص
  5. تهيجات القولون المستمره
  6. تساقط الشعر

غالبا هذه اهم اعراض تراكم السموم بالجسم

و دايم أنصح للي تبي تبدا نظام صحي أو دايت تبداه بالديتوكس بعدين تسويه ، لأنه رح يخلي جسمك يستجيب للنظام اسرع من لو ماسويتيه

و فيه انواع كثييره للديتوكس

فيه نظام العصائر و نظام الخضار النيه و نظام زيت الخروع و غيرها

حتى فيه منتجعات صحيه كامله للديتوكس

جربت بعض الأنواع و هالنوع تبع دكتوره فاديه الثبيتي كان أسهلها ، و كثير يتقبلونه

نظام الدتوكس عموما يعتمد عالماء بشكل رئيسي

ثم خضار

فواكه

بعض الأعشاب و البذور

ممنوع / حليب و منتجات اجبات و ألبان – لحوم – قمح – معلبات – اي اكل مصنع مثل الصلصات و الحلويات و التشيبسات – العصيرات المصنعه والمشروبات الغازيه  – الرز و البطاطس و الطماطم

و ممكن تسوينه من 3 ايام لـ 7 ايام او اسبوعين حسب حاجتك و انتي اللي تفهمين جسمك و تعرفين ايش يحتاج

النظام اللي أنا سويته شخصياً ✋

لمدة 5 أيام /

أول ساعتين من الإستيقاظ شرب ماء الفيتامينات او ماء الديتوكس

اقعد اشرب فيه اول ماأقوم كل شوي

اللي هو عباره عن ماء فيه اللي تحبون من الفواكه : مثلا نعناع و ليمون ، بلوبيري خيار تفاح بطيخ اي شي

بعدها أسوي سموثي عباره عن /

شمندر ( لتقوية البدن و الدم و صفاء البشره و توزيع اكسجين اكثر للجسم )

كزبره ( كلوروفيل للتخلص من السموم الثقيله )

فراوله ( مضادات اكسده و لتحسين طعم السموثي )

حليب نباتي ( مره حليب لوز و مره حليب جوز هند ) الحليب البقري ممنوع

أو أعمل عصير خضار بالعصاره مع شوية فواكه ( كزبره كيل جزر تفاح اناناس كيوي زنجبيل خيار اللي حابين )

و اسوي كميه منه اقعد اشرب فيه طول اليوم

الغداء /

شوربه يكون فيها جزر و بصل اخضر و اي خضره موجوده ، احمس البصل و اضيف بهاراتي و الخضره اللي عندي و اصب عليها ماء و اخليها نص ساعه او حتى النضوج ، مو لازم تطبخ كثير

و معها طبق سلطه لكن بدون صلصة أو ممكن اخلي الصوص ليمون و ملح همالايا و خل

العشاء /

افواكادو او كوسا او بطاطا حلوه مشويه مع زعتر و كركم و بابريكا يعني الزبده خضره

بين الوجبات و خلال اليوم /

شاي اعشاب مثل الكركم و النعناع و اليانسون و الكمون و القرفه و المراميه

تمر

عصير فريش

 

و اذا عندكم مكملات طبيعيه مثل عشبة القمح و السبيرولينا و المورينجا و غيره هذا وقتها بتكون ممتازه

و أغلبها نلقاها عند اي هيرب او جي ان سي او المحلات اللي تبيع اكل عضوي

و حلو ندخل مع ديتوكس الجسم ديتوكس للعقل او التفكير

أذكر فيه أحد بالسناب تكلم عنه بس نسيت مين

باختصار أنكم تطردون كل الأفكار السلبيه و تفكرون بإيجابيه فقط فقط

و بيكون سهل عليكم خلال الديتوكس تسوونه ، لأنه خلال الديتوكس يكون فيه صفاء ذهني عجيب

 

على طاري الأعراض /

غالبا أول يوم بتجوعون و فجأه تشتهون الأشياء اللي ماعمركم اشتهيتوها 💔🙄 شاورما دونات كنتاكي نوتيلا إلخ إلخ

بس ماعليكم هالشي نفسي بس و بالعكس مع الوقت تقدرون تهذبون نفسكم عن هالاشياء

عشان ماتعطون نفسكم فرصه تجوعون و تخربون الديتوكس ، سووا كميه كبيره من العصير – السلطه – الشوربه – و كل شوي كولوا و اشربوا منه

مثل ماقلت صفاء ذهني عجيب و روقان

خففففففه

تحسون نفسكم خفيفين مثل الريشه ، تنامون خفيفين و تقومون خفيفين

ماتشيلون هم الأكل ، وش أكل ، وش أفطر ، جوعانه اخر الليل ، باكل قبل مااروح ، باكل عشان مااجوع بعد شوي ،،، كل هالافكار اكتشفت انها كانت مشغلتني قبل ، خلال الديتوكس تختفي تماما و يصير فيه تهذيب للنفس عن الاكل

هذا اللي حسيت فيه حاليا ، أنا في رابع يوم ، باقي لي بكرا بس و اكمل برنامج الديتوكس حقي

شعور انجاز عظيم اذا خلصتي برنامج الديتوكس

المفروض اول ماتخلصون الديتوكس ماتهجمون فجأه عالاكل 🙅 شوي شوي خلوه صحي و خفيف قد ماتقدرون

اعرف وحده ختمت برنامج الديتوكس حقها بصاروخ شاورما و طقتها نزله معويه 😂 لا تصدمون بطنكم بهالطريقه لأنه حاليا نظيف و تعود عالاكل الخفيف و العصاير مثل الشوفان و الرز و الخضار المطبوخه

اممم أن شاء الله اني غطيت كل شي بالديتوكس اليوم اذا عندكم اي استفسار أسألوني و رح اعدل عالمدونه و اكتبها هنا

دمتم سالمين

9 thoughts on “الديتوكس .. نظام تطهير الجسم من السموم

  1. أنا جربت ديتوكس عصيرات من قبل ووصفك ما شاء الله جدا دقيق وصحيح.
    جزاك الله خيرا على المقال المفيد النافع.

  2. السموم ممكن تطلع بأشكال ، و احد هذه الاشكال ممكن تطلع على شكل حبوب ، وارد الحبوب تزيد بعد الديتوكس بعدين تختفي للابد باذن الله

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.